Jin daketin qadan

Jinên Kurd yên li seranserê welatên Ewrupayê bi şîara “Ji tundiya li dijî jinan re na”, daketin qadan. Bi vê armancê li gelek bajarên Ewrupayê meş hatin lidarxistin.

 

Bi wesîleya Roja Têkoşîna Navneteweyî ya li Dijî Tundiya li Hember Jinê li herêmên Parîs û Ile De France çalakî pêk hatin. Jin li semta Seint Denisê li ber avahiya şaredariyê li hev kom bûn û meşiyan. Piştre bi beşdariya endamên tevgera jinên Kurd panelek bi rojeva Kobanê hate lidarxistin. Li navenda Parîsê jî, rêxistinên jinan li qada Bastilleyê li hev kom bûn. Di çalakiyê de polîtîkayên cudakar ên li dijî jinan û kêmkirinên butçeya jinan a Fransayê şermezar kirin. Parlamenterên Partiya Komunîst (PS) senator û şaredar jî tevlî çalakiyê bûn. Kolektîfa Jinan a Neteweyî û rêxistinên feminîst bi pankartên xwe tevlî meşa li vê derê bûn. Li Qada Republiqueyê mîtîngek pêk hat û axaftin hatin kirin. Li bajarê Marsîlayayê jî bi heman armancê meşek pêk hat. Meşa li ser banga Tevgera Jinên Kurdistanê li Ewropayê pêk hat. Li dû meşê, li meydana Vieux Portê mîtîngek hat lidarxistin. Meş û mîtîng bi axaftinên li ser navê Jinên kurd li Marsîlyayê û Tevgera Jinên Kurdistanê li Ewropayê, bi dawî bû.

Li Frankfurtê meş
Li bajarê Franfurt ê Elmanya meşek hat lidarxistin. Bi dehan jin beşdarî meşa li ber Îstasyona Trenê ya Navendî ya Franfurt bûn. Di meşê de pankartên, "Ji Şengalê heta Kobanê jin li ber xwe didin”, "Ji Qirkirina Jinê re bes e” hatin vekirin. Wêneyên jinên şoreşger Rosa Luxemburg, Sakîne Cansiz, Fîdan Dogan, Leyla Saylemez, Clara Zetkîn hatin hilgirtin. Li ser navê jinên ku hatin Qada Alte Oper berdevka Meclîsa Jinan a Amara axaftinek hat kirin. Rêvebera Saziya Jinan, "Courage" Bernadette Leîdînger Beîerle jî li vir axivî û got, "Em ji bo civakeke ku jin wekhev bijî û neyê pelçiqandin têdikoşin.

Li Dusseldorfê meşa navendî
Bi tevlîbûna jinên ji bajarên Dortmund, Duisburg, Essenê li bajarê Dusseldorfê yê Almanyayê meşek hat lidarxistin. Di meşê de wêneyên Arîn Mîrxan, Sakîne Cansiz, Leyla Şaylemez û Fîdan Dogan hatin hilgirtin. Meşê heta ber Muzeya Hunerê ya Meydana Grabbeplatzê dewam kir. Li dû deqeyeke rêzgirtinê ji bo bîranîna cangoriyan, li ser navê Meclîsa Jinê ya Wuppertalê û Weqfa Utamara axaftin hatin kirni. Li dû axaftinan meş û mîtîng bi dawî bû. Li bajarê Nurnberg, Koln, li bajarê Hollanda Rotterdam, paytexta Awûstûrya Viyan bi heman armancê meş û mîtîng hatin lidarxistin. Di axaftinan de hat gotin ku Tevgera Azadiyê ya Jinên Kurd li hemberî sîstema kapîstalîst û serdest têdikoşe û bang li tevahiya jinan hat kirin ku vê têkoşînê li her qadê xurt bike. Aktîvîstên jin diyar kirin ku ew bi çalakiya xwe re tundiya mêr rûreş û şermerzar dikin.

NAVENDA NÛÇEYAN

‘Berê xwe bidin Kobanê’

Êrîşên çeteyên DAIŞ'ê yên li hemberî Kobanê di roja 66. de dewam dikin. Li dijî êrîşên DAIŞ'ê jî, şervanên YPG û YPJ'ê li her sê eniyan li ber xwe didin.

Di pevçûnên li eniyên rojhilat, başûr û rojava de, şervanên YPG/YPJ'ê derbên giran li çeteyên DAIŞ'ê dixin û wan ji herêmê derdixînin. Yek ji eniyên ku lê şer giran e, eniya başûrrojava ye. Li vê eniyê bi şev pevçûnên dijwar diqewimin, bi roj jî bi rêbaza sûîkastê pevçûn bê navber dewam dike. Li vê eniyê, mîna li eniyên din moralê şervanên YPG/YPJ'ê xurt û bilind e. Ji bo armanca û sozên hevalên xwe yên winda kirine bicih bînin li ber xwe didin û destnîşan dikin ku heta çeteyên DAIŞ'ê ji bajêr derxînin, ew ê berxwedana xwe dewam bikin.

Berxwadeneke mezin heye
Yek ji şervanên YPJ'ê yên li vê eniyê li dijî DAIŞ'ê têdikoş e Viyan Avareş e. Du xwişkên wê jî li eniyên cuda di nava berxwedanê de ne. Bavê wê jî, hem jî pêwîstiyên zarokan hem jî yên hevalan çareser bike, li eniya paş di lojîstîkê de dixebite.
Viyan Avareş got, "Li Kobanê berxwedaneke mezin hat nîşandan. Li vir ji sala 2011'an û vir ve şer heye" û axaftina xwe wiha dewam kir: "Em li aliyê Til Ebyadê bûn. Bi tankan êrîşî me kirin, di destê me de jî bi tenê kalaşnîkov a me hebû. Bi bi kalaşnîkovê berfi didan wan. Rewşa Kobanê wê baş bibe. Heta dilopa dawî ya xwîna xwe em ê dest ji Kobanê bernedin. Di destê me de malek bi tenê jî bimîne, em ê li wir li ber xwe bidin. Û serketin a me ye."
Viyan Avareş da zanîn ku berî tevlî YPJ'ê bibe hin hevalên wê jiyana xwe ji dest dane û tevlîbûna xwe bi van hevokan anî ziman: "Dema wan jî bi lehengî li ber xwe dan û şehîd ketin, min nema dikarîbû li malê rûniştî bimam. Bavê min hat ji me re got, 'Rûniştina li malê êdî nabe' û li ser vê yekê ez tevlî bûm. Bavê min destê me hersêyan girt û anîn teslîmî hevalan kir. Serketin ji me xwest."
Viyana Avareş diyar kir ku li eniya başûrrojhilat bi giranî şervanên jin şer dikin û got, "Dema em êrîş dikin dijmin ji me ditirse. Ji tilîliyên me ditirsin. Piştî ku me ewçend berdêl dan, em ê ti carî ji vir ji wan re nehêlin. Bila gele me yê koçî Bakur kiriye vegere û destekê bide YPG/YPJ'ê. Em di çeperan de bi hev re li ber xwe bidin. Serketin wê ya me be."

‘Vegerin Kobanê‘
Zinar Kobanê yê li gel Viyan Avareş di eniya başûrrojava de şer dike, anî ziman ku rewşa li eniyê baş e. Zinar Kobanê got, "Êrîş kirin, lê tiştek bi dest nexistin. Ji bo bidestxistina Kobanê çiqasî êrîş kirin ewqasî jî rastî berxwedanê hatin. Heta dilopa dawî ya xwîna xwe em ê li ber xwe bidin." Zinar Kobanê bang li hemsaliyên xwe yên neçar man koçî Iraq û Tirkiyeyê bikin kir û got, "Dest ji xaka xwe bernedin. Berê xwe bidin Kobanê."


ERSÎN ÇAKSÛ/ÎBRAHÎM ASLAN /DÎHA / KOBANÊ

Bi Kurdî ‘Nexweşê Nexweşiyê’

Şanoya Bajêr ya Şaredariya Bajarê Mezin a Amedê dest bi amadekariyên sezona şanoyên sala 2014’an kir. Di nava xebatên wan yên îsal de sê lîstikên Kurdî cih digirin. Di demeke kurt de lîstika ‘Nexweşê Nexweşiyê’ derdikeve pêşberî şanohezan.

Şanoyek klasîk ya bi navê Nexweşê Nexweşiyê ya ku di sala 1673’an ji aliyê nivîskarê Fransi Molière ve hatiye nivîsandin. Lîstika Nexweşê Nexweşiyê ya ku heya niha wergerî gelek ziman hatiye kirin û ser dikên şanoyan hatiye lîstin. Dê îsal jî ji aliyê Şanoya Bajar ya Şaredariya Bajarê Mezin ya Amedê ve bi Kurdî pêşkêşî şanohezan bê kirin.

Lîstika Nexweşê Nexweşiyê ya komîdî ji 10 karekteran pêk tê. Yek ji wan karekteran jî Şanoger Rêzan Kaya dilîze û der barê xebatên xwe de wiha dibêje: “Me lîstika Nexweşê Nexweşiyê ji fransî wergerî Kurdî kir. Lîstik amade bûye û dê di demek kin de derkeve pêşiya şanohezan. Her wiha ji derveyî wê jî em amadekariyên sê lîstikên dinê jî dikin.”

3 lîstikên cuda
Derhênerê lîstika ‘Nexweşê Nexweşiyê’ Ruknettîn Gun bi lêv kir ku di bernameya Şanoya Bajêr ya sala 2014’an de lîstikên ku bi formên cûda hatine amadekirin hene. Gun anî ziman ku ji bo zarokan jî îsal 2 lîstik hene û wiha got: “Îsal di bernameya Şanoya Bajêr de 3 lîstik ji bo mezinan û 2 lîstik ji bo zarokan tên amadekirin. Ji bilî lîstika Nexweşê Nexweşiyê, lîstika Şeş Tilî jî heye. Lîstika Şeş Tilî ji aliyê nivîskar Ehmed Osman ve hatiye nivîsandin û ev lîstik drama ye. Em ê îsal bi lîstikên cuda yên bi formên cuda tên amadekirin derkevin pêşberî şanohezan. Navê vê formê Spora şano ye. Spora şano, ji xwe bêrê de heye û bi xwe çêdibe ango xwezayiye. Senaryo û mijara lîstikê ji nerînên temaşevan tê amadekirin.”

Ji ber Kobanê rawestiya


Gun diyar kir ku sezona şanoyan ya sala 2014'an li qonaxa Cemîl Paşa destpêkir lê piştî bûyerên ku li Kobanê pêk hatin wan xebatên xwe dan rawestandin û wiha axaftina xwe bi dawî kir: “Ger xebatên me nehatiba rawestandin divabû ku amadekariyên me di meha cotmehê de bi dawî bibana. Li Kobanê berxwedan û serkeftinek mezin hebû. Rewşa Kobanê di her aliyî de ser her kesê bandor dikir. Serkeftinan hêzek mezin dida me. Di serdemekê de dema ku civak trajediyek wisa bijî wê çaxê gotinek hunerê tune ye. Li hembeî vê trajediyê tu cûreyên hunerê tune ye ku vê êş ê vebêje.”


ŞÊRÎN HISO/JINHA/AMED



‘Xwezgînî’ diçe Enqereyê!


Şanoya Şaredariya Bajarê Mezin a Amedê (DBŞT) bi şanoya bi navê Xwezgînî beşdarî 19’emîn Mîhrîcana Şanoyê ya Enqereyê dibe.
Lîstîkvanên Şaredariya Bajarê Mezin a Amedê (DBŞT) dê tevli 19’emîn Mîhrîcana Şanoyê ya Enqereyê ya ji aliyê Weqfa Lêkolînên Civakî ya ji bo Çand û Hunerê (TAKSAV) vê tê lidarxistin bibin. Lîstika bi navê Xwezgînî ya komedî ye di 25’ê mijdarê de saet di 20.00’an de li Dîka Akunê ya Şanoya Dewletê derkeve pêşberî temaşevanan. Di şanoya ku derhêneriya wê şalîko Bêkes dike de lîstîkvanên bi navên Ozcan Ateş, Rezan Kaya, Kemal Ulusoy, Salîh Yildizoz cih digirin. Biletên mîhrîcanê li TAKSAV, Dîka Şînasî ya DT, Dîka Cuneyt Gokçer a Çayyoluyê ya DT û mybiletê tên dayîn.


Îsal ji 57 welatên wekî Holanda, Îspanya, Îran, Amerîka, Rûsya, Gurcistan, Kanada û Yewnanistanê jî di navde ne bi komên şanoyê beşdarî mîhrîcanê dibin. Mîhrîcana ku di 21’ê mijdarê de dest pê dike di 30’ê mijdarê de bi dawî bibe.

DÎHA/AMED