Armanc jinavbirina Rojava ye

Piştî belavbûna belge û dîmenên ku Tirkiye hevkariya çeteyên DAIŞ’ê dike, li Başûrê Kurdistanê 66 partî û aliyên siyasî yên Kurdistanî li hemberî vê yekê nerazîbûn nîşan dan.

 Di daxuyaniyê de wiha tê gotin: “Hevkarî û piştgiriya alî, dewlet û rêxistinên ku li dijî DAIŞ’ê alîkariya me kurdan kirine, cihê rêzdariyê ye û nayê ji bîr kirin. Lê tevî alîkarî, piştgiriya welat û hevpeymanan a ji bo gelê Kurdistanê, hinek alî û welat jî hene ku ji bo bigihin armancên xwe, alîkariya DAIŞ’ê dikin. Em di vî warî de wan rastiyan ji raya giştî re eşkere dikin.”

Tirkiye dostaniya kî dike?
Serokê partiya Yekîtiya Neteweyî ya Demokratîk a Kurdistanê YNDK Xefûr Mexmûrî daxuyanî xwend û got ku êrişa di deriyê Mûrşîdpinar yê sînorê Tirkiyê re pêk hat ji aliyê her kesî ve eşkere hat dîtin. Mexmûrî got, armanca Tirkiyê ya ji bo piştgiriya DAIŞ’ê, jinavbirina şoreşa rojavayê Kurdistanê ye. Ev jî tê wateya şikandina vîna gelê kurd. Di rewşekî wiha de em daxwaza lijneyeke bê alî dikin ku vê yekê bişopînin û rastiyan ji bo hemû aliyan derbêxin holê. Di heman demê de em daxwazê ji Tirkiyê dikin ku xwe yekalî bike, gelo dixwaze dostaniya kurdan bike yan jî ya DAIŞ’ê?
ROJNEWS/HEWLÊR